Böyük Britaniya Rusiya lideri Vladimir Putinlə Avropanın birbaşa danışıqları bərpa etməsi barədə təklifi dəstəkləmir.

Reyting.az “Politico” nəşrinə istinadla xəbər verir ki, Böyük Britaniyanın daxili işlər naziri İvet Kuper Moskvanın sülhə inandırıcı maraq göstərmədiyini bildirib.

Qeyd olunur ki, İvet Kuper Fransa prezidenti Emmanuel Makronun və İtaliyanın baş naziri Corcia Meloninin Avropanın Ukraynadakı müharibəyə son qoymaq səylərinin bir hissəsi kimi Rusiya ilə diplomatik əlaqələrin bərpa olunması barədə təkliflərini rədd edib.

“Düşünürəm ki, Putinin həqiqətən sülh istədiyinə dair dəlillərə ehtiyacımız var. Bu mərhələdə isə mən hələ də belə dəlillər görmürəm”, - deyə o vurğulayıb.

“Politico” yazır ki, bu açıqlamalar Brüsseldə Vaşinqtonun Moskva ilə gələcək danışıqlarda liderliyi ələ alacağı təqdirdə Avropa İttifaqının prosesdən kənarda qala biləcəyi ilə bağlı narahatlıqlar fonunda səsləndirilib. Kuper bildirib ki, diplomatik ağırlıq mərkəzi hazırda Ukrayna və onun ən yaxın tərəfdaşları üzərindədir.

“Ukraynanın, ABŞ-nın və Avropanın dəstəyi ilə, xüsusilə təhlükəsizlik zəmanətləri çərçivəsində sülh planları hazırlamaq üçün ciddi öhdəliklər görürük. Lakin indiyədək Putinin danışıqlar masasına oturmağa və ya müzakirələrə açıq olmağa hazır olduğuna dair heç bir dəlil görməmişəm”, - deyə nazir əlavə edib.

O, həmçinin qeyd edib ki, belə dəlillər olmadığı halda Moskvaya təzyiq azaldılmamalı, əksinə, sanksiyalar və Ukraynaya hərbi dəstək vasitəsilə daha da gücləndirilməlidir: “İnanıram ki, bu son dərəcə vacib işlə paralel olaraq iqtisadi təzyiqi və Ukraynaya hərbi dəstəyi artırmaqla Rusiyaya qarşı təzyiqi gücləndirməyə hazır olmalıyıq”.

Xatırladaq ki, Fransa prezidenti Makron Avropanın müəyyən mərhələdə Putinlə dialoqu bərpa etməli olacağını deyib. O bildirib ki, ABŞ-nın Ukraynada sülhə nail olmaq səyləri uğursuz olarsa, belə bir dialoq qaçılmazdır. Makron həmçinin Avropa liderlərinin Rusiya ilə sülh danışıqlarından kənarda saxlanılmasından narazılığını ifadə edib.

İtaliyanın baş naziri Corcia Meloni də Makronun mövqeyini bölüşüb:

“Düşünürəm ki, Makron haqlıdır. Avropanın Rusiya ilə danışmasının vaxtı çatıb, əks halda təsir imkanlarımız məhdudlaşacaq. Lakin əsas sual budur ki, bunu kim etməlidir? Biz xaotik davranmamalıyıq, əks halda Putinin maraqlarına xidmət etmiş olarıq”.

Bundan əlavə, Avropa Komissiyasının sözçüsü Paula Pinyo da yaxın vaxtlarda Putinlə birbaşa danışıqların qaçılmaz olduğunu bildirib. Onun sözlərinə görə, Ukraynada sülh bir nəfərdən asılıdır və bu şəxs Rusiya lideridir: “Buna görə də, müəyyən mərhələdə prezident Putinlə danışıqlar aparmalı olacağımız aydındır”.

E. KAMAL