“The Telegraph”: “Ən çox itirən Ermənistan və baş nazir Paşinyandır”

“Ən çox itirən Ermənistan və baş nazir Paşinyandır”. Britaniyanın “The Telegraph” qəzetində dərc olunmuş, sonuncu Qarabağ müharibəsindən bəhs edən yazıda belə deyilir.

Novator.az-ın məlumatına görə, Ceyms Kilnerin müəllifliyi ilə işıq üzü görən yazıda vurğulanır ki, çağdaş Ermənistanda “Dağlıq Qarabağı Azərbaycandan qoruyan cəsur erməni ordusu” düşüncəsi hakim idi. Bu düşüncənin uğursuzluğa düçar olduğunu bildirən müəllif yazır ki, müharibədəki məğlubiyyət, Ermənistanın Qarabağa nəzarəti itirməsi ikicə il qabaq inqilabla iqtidara gəlmiş Paşinyanın siyasi karyerasını, çox güman, qısaldacaq.

Müəllifin fikrincə, Azərbaycanla Ermənistan arasındakı müharibə Rusiyanın Cənubi Qafqazda manevr imkanlarının məhdud olduğunu da üzə çıxardı: “Artıq sabitliyi təmin etmək üçün, ikinci planda da olsa, Türkiyənin dəstəyinə ehtiyac var. Kreml son müharibədə iki dəfə atəşkəsə çalışdı, heç biri alınmadı. Yalnız müharibə sona yaxınlaşandan və bir neçə min insan öldürüləndən sonra Kreml sülh razılaşması əldə edə bildi. Bundan ötrü 2000-dək rus hərbçisinə sülhməramlı missiya tapşırıldı”.

Qərbə gəlincə, yazıda bildirilir ki, koronavirus, terror hücumları, ABŞ-dakı prezident seçkisi kimi məsələlərdən narahat olan Qərbin keçmiş sovet məkanında baş qaldıran hadisələrə maraq göstərmədiyi açıq-aşkar gözə dəydi və Qarabağda müharibənin getdiyi günlərdə ABŞ-ın vasitəçiliyi ilə əldə olunan atəşkəs razılaşmasının kağız üzərində qalması, mürəkkəbi quruyar-qurumaz razılaşmanın pozulması buna sübutdur.

Xatırladaq ki, 1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildən təcavüz şiddətlənərək hərbi işğala çevrilib. 1994-cü ildə atəşkəslə dayanan müharibədə Ermənistan Dağlıq Qarabağdakı Xankəndi şəhərini, Şuşa, Xocalı, Xocavənd rayonlarını, keçmiş Ağdərə rayonunu və Dağlıq Qarabağ ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) işğal edib.

2020-ci il sentyabrın 27-dən noyabrın 10-dək Azərbaycan Ordusunun işğal bölgəsində keçirdiyi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, 4 qəsəbə və 286 kənd azad olunub.

Bu müddətdə üç dəfə – oktyabrın 10-u, 18-i və 26-sı humanitar atəşkəs barədə razılığa gəlinsə də, atəş dayandırılmayıb.

Noyabrın 9-da Azərbaycan prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putin birgə bəyanat imzalayıblar. Bu razılaşmaya görə, noyabrın 10-dan münaqişə zonasında atəş və bütün hərbi əməliyyatlar dayandırılır. Ermənistan noyabrın 15-dək Kəlbəcər rayonunu, noyabrın 20-dək Ağdam rayonunu, dekabrın 1-dək Laçın rayonunu Azərbaycana qaytarır.

Erməni silahlı qüvvələrinin çıxarılması ilə paralel şəkildə Dağlıq Qarabağda təmas xətti və Dağlıq Qarabağla Ermənistan arasında əlaqəni təmin edəcək Laçın dəhlizi boyu Rusiyanın sülhməramlı kontingenti yerləşdirilir.

Münaqişə tərəflərinin razılaşmalara əməl etməsinə nəzarətin səmərəliliyinin artırılması məqsədilə atəşkəsə nəzarət üzrə sülhməramlı mərkəz yaradılır.

Daxili məcburi köçkünlər və qaçqınlar BMT-nin Qaçqınlar üzrə Ali Komissarlığının ofisinin nəzarəti altında Dağlıq Qarabağ ərazisinə və ətraf rayonlara geri qayıdır.

Bölgədəki bütün iqtisadi və nəqliyyat əlaqələri bərpa edilir. Ermənistan vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətinin təşkili məqsədi ilə Azərbaycanın qərb rayonları və Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verir. Nəqliyyat əlaqəsi üzrə nəzarəti Rusiyanın Federal Təhlükəsizlik Xidmətinin Sərhəd Xidmətinin orqanları həyata keçirir.

Reyting.az

Ana səhifəyə dön