Konqres binasında atışma: ölənlər və yaralılar var - ABŞ-da gərginlik pik həddə çatıb

ABŞ prezidenti Donald Trampın tərəfdarları Capitoliya binasına girməyə çalışıblar.

Reyting.az xəbər verir ki, bu barədə “NBC News” məlumat yayıb.

Bildirilib ki, Konqres binası qarşısında Trampın tərəfdarları ilə polis arasında qarşıdurma baş verib. Kütlə Konqres binasına girməyə cəhd edib.

Konqresmen Riçi Torres açıqlamasında bildirib ki, ona və həmkarlarına Konqres binasının bir hissəsi olan Kannondan ayrılmaqları istənilib.

Qeyd edək ki, bundan əvvəl ABŞ Konqresində seçkilərin nəticələrinin təsdiqlənməsinə dair etirazlarla bağlı müzakirələr aparılıb. Bir qrup senator Arizona çtatında seçici səsinin təsdiqlənməsinə etiraz edib. Bundan sonra, Konqresin ümumi iclasına rəhbərlik edən vitse-prezident Mayk Pens iclasın qapalı olduğunu, palatalarında etirazları ayrı-ayrılıqda müzakirə edəcəyini və müvafiq səsvermə keçirəcəyini bildirmişdi.(APA)

***

ABŞ-ın paytaxtı Vaşinqtonun meri şəhərdə komendant saatı elan edib.

Bildirilir ki, komendant saatı yerli vaxtla saat 18:00-dan elan edilib.

Məhdudiyyətlər ABŞ prezidenti Donald Trampın tərəfdarlarının paytaxtdakı kütləvi etirazları, o cümlədən Konqresin binasına daxil olmağa cəhdləri ilə bağlıdır.

***

Trampın tərəfdarları ABŞ Konqresinin binasına daxil olublar.

TASS xəbər verir ki, bu barədə Konqresin yuxarı palatasının iclasına rəhbərlik edən senator Ceyms Lenkford bildirib.

Qeyd edib ki, Konqresin hər iki palatasında prezident seçkilərinin nəticələrini təsdiqləyən ortaq iclasın dayandırılmasından sonra Arizona ştatındakı son səsverməyə etirazlar müzakirə edilib. O əlavə edib ki, etirazçılar Konqres binasındadır, Senatın Nümayəndələr palatasında fasilə elan edilib.

MSNBC telekanalının məlumatına görə, senatorlar təhlükəsiz şəkildə binadan təxliyə edilib.

CBS isə məlumat yayıb ki, polis ABŞ Konqresinin binasındakı nümayişçiləri dağıtmaq üçün gözyaşardıcı qazdan istifadə edir.

***

ABŞ Senatının ardınca Nümayəndələr Palatası da Konqresin binasının daxilində baş verən etirazlara görə iclasını yarımçıq kəsib.

Bu barədə Nümayəndələr Palatasının mətbuat xidməti özünün tvitterdəki hesabında bildirib.

Qeyd edilir ki, Nümayəndələr Palatasının spikeri Nensi Pelosi də daxil olmaqla, Konqres üzvləri binadan təxliyyə ediliblər. Daha əvvəl Senatın da iclası yarımçıq kəsilib.

Müxtəlif nəşrlərin jurnalistləri hadisə yerindən bildirib ki, etirazçılar zorla iclasın getdiyi zala girməyə çalışırlar.

Yerli radionun verdiyi məlumata görə, silahlı Kapitoli polisi etirazçılardan Konqresin binasını tərk etməyi tələb edib.

PBS telekanalı isə mənbəyə istinadən Konqres binasında atışmanın baş verdiyi bildirib. Qeyd edilir ki, etirazçılardan biri odlu silahdan açılan atəşlə sinəsindən yaralanıb. Yaralanan şəxs qadındır.

Öz növbəsində Vaşinqton meri Myuriel Bouzer vəziyyətə nəzarət etmək üçün Milli Qvardiya bölmələrini Konqresə göndərməyi xahiş edib.

NBC telekanalı isə bildirib ki, Nensi Pelosi də analoji müraciətlə çıxış edib/Report.

Son məlumata görə, ABŞ-ın Virciniya ştatı Vaşinqtonda Milli Qvardiyanın hərbçilərini göndərir.

Bu barədə ştatın qubernatoruna istinadən "Reuters" bildirib.

Eyni zamanda, ABŞ prezidenti Donald Tramp da etirazçıların zorla daxil olduqları Konqresə Milli Qvardiyanın hərbi qulluqçularını göndərmək barədə göstəriş verib.

O, etrirazçılardan sakitləşməyi xahiş edib: “Hər kəsdən xahiş edirəm ki, sülhə riayət edək. Zorakılığı dayandıraq!”.

***

Son məlumata görə, ABŞ-ın Kapitoliya binasında atışma nəticəsində ən az beş nəfər yaralanıb, birinin vəziyyəti ağırdır.

Bu barədə “Sky News” telekanalı məlumat yayıb.

Bildirilir ki, Konqres binası qarşısında prezident Donald Trampın tərəfdarları ilə polis arasında yaranan qarşıdurmada asayiş keşikçiləri gözyaşardıcı qaz və səs bombasından istifadə edib. Yaralılar var.

***

Vaşinqtonda keçirilən etiraz aksiyalarında toqquşmalar zamanı 4 nəfər ölüb.

Bunu Vaşinqton polisinin rəhbəri Robert Konti bildirib.

Bundan əvvəl Konqres binası qarşısında polis əməkdaşının açdığı atəş nəticəsində ağır yaralanan aksiya iştirakçısı, ABŞ Silahlı Qüvvələrinin veteranı Eşli Bebbitt həyatını itirib. R. Konti deyib ki, Konqres binası yaxınlığında qarşıdurma zamanı daha 3 nəfər ölüb.

Aksiyalarla əlaqədar 52 nəfər saxlanılıb. Onlar qanunsuz silah daşıma və komendant saatı rejimini pozmaqda təqsirli bilinirlər.

Qeyd edək ki, dünən prezident Donald Trampın tərəfdarları seçkilərin nəticələrinə etiraz olaraq Konqres binası qarşısında aksiya keçirib, daha sonra binaya daxil olublar. Təhlükəsizlik qüvvələri daha sonra onları binadan çıxarmağa nail olub.

Ana səhifəyə dön