Pentaqonda ciddi dəyişiklik: 30-dan çox şəxs vəzifədən kənarlaşdırılır

Pentaqonda sabiq ABŞ prezidenti Donald Trampın tərəfdarlarına qarşı “əməliyyat” keçirilib.

Reyting.az xatırladır ki, ABŞ Müdafiə naziri xidməti müddəti bitməsinə iki ay qalmış nazirliyin Müdafiə siyasəti, sağlamlıq, elm və iş qaydaları sahəsində uzun illər xidmət göstərən bəzi şəxsləri vəzifədən kənarlaşdıraraq onların postuna Donald Trampı dəstəkləyən şəxsləri gətirmişdi.

İndisə aralarında Konqresin Nümayəndələr Palatasının sabiq spikeri olan Partili Nevt, təqaüddə olan general Antoni Tata və Trampın seçki qərargahının keçmiş idarəçilərindən Korey Levandovski də daxil olmaqla 30-dan çox Tramp tərəfdarı yeni Müdafiə naziri Austinin tələbi ilə istefa verəcək.

Bildirilir ki, Pentaqon rəhbəri Loyd Austin ötən gün Məsləhət Şurasına xüsusi təlimat verib. Təlimata görə, bütün məsləhət komitələrinin fəaliyyəti qiymətləndirmə başa çatana qədər dayandırılacaq.

Austin ayrıca Müdafiə nazirinin vəkili tərəfindən təyin olunan bütün komitə üzvlərindən fevralın 16-na qədər istefa vermələrini istəyib.

İddialara görə, nazir Austin qiymətləndirmə zamanı məsləhət şuralarının nazirliyin işinə nə dərəcədə töhvə verdiyini müəyyənləşdirəcək, qurumların “aktual strateji prioritetlər və Milli Müdafiə Strategiyası”na uyğunlaşdırmağa çalışacaq.

İstefada olan general Antoni Tata islam dininə münasibətdə xoş olmayan görüşlərə malik şəxs sayılır. Donald Tramp generalı Pentaqonun Müdafiə Siyasəti İdarəsinə rəhbər gətirməyə çalışsa da, general bu vəzifəyə getmək üçün Senatdan dəstək ala bilməmişdi. Amma Tramp general Tatanı bu vəzifəyə noyabrda təyin etməyə nail olub. Halbuki artıq Mark Esper Müdafiə naziri vəzifəsindən çıxarılmış və yerinə Kristofer Miller təyin olunmuşdu. Yeri gəlmişkən, Miller yanvarın 19-da general Tatanı Pentaqonun Müdafiə Siyasəti İdarəsinə rəhbər təyin etmişdi. Korey Levandovski isə Pentaqonun Müdafiə İşi İdarəsinə rəhbər gətirilmişdi. Halbuki həmin gün Müdafiə nazirinin sonuncu iş günü sayılırdı və yerini Baydenin namizədi olan Austin tutacaqdı.

Pentaqonun adının çəkilməsini istəməyən yüksək vəzifəli əməkdaşı bildirib ki, Austinin bu addımları Kristofer Millerin Trampın seçki məğlubiyyəti ilə Baydenin inaqurasiyası arasındakı müddətdə vəzifəyə gətirməsindən qaynaqlanır.

Məlumata görə, yeni nazirin qərarı əsasında 42 Məsləhət Şurasından 32 nəfər vəzifəsindən qovulacaq. Altı Məsləhət Şurası qiymətləndiriləcək, beş şura isə ləğv ediləcək. İstefası tələb olunan şəxslər Pentaqonun ən çox tanınan idarələrində çalışırlar.

Bu qurumlar Pentaqonun Müdafiə siyasəti, elm, sağlamlıq kimi sahələrində siyasəti hazırlayır, habelə Arlinqston Milli Əsgər Məzarlığı və ordudakı qadın personalın idarəçiliyində iştirak edir.

Bununla belə Quru Qoşunları, Donanma və Hava Qüvvələri akademiyasına işə götürülən şəxslər işlərinə davam edəcək. Çünki nazir Austinin bu şəxsləri vəzifədən azad etmək səlahiyyəti yoxdur. Şəxsən Trampın təyin etdiyi bu şəxslər arasında Ağ Evin sabiq mətbuat katibi Şon Spayser, uzun müddət Trampın məsləhətçisi olan Kellayanne Konvay da var. Amma bu şəxslərin işlədiyi idarələr də nazirin təlimatı əsasında qiymətləndiriləcək.

Bu addımlara paralel olaraq keçmiş Müdafiə naziri Millerin yanvarda 4 nəfəri təyin etdiyi başqa bir struktur da Tramp tərəfdarlarından təmizlənəcək. Konqres tərəfindən razılığı verilən bu struktur hələlik rəsmən fəaliyyətə başlamayıb. Qeyd edilir ki, bu qurumun vəzifəsi ABŞ-da vətəndaş müharibəsi zamanı köləlik tərəfdarı olan konfedrasiya komandirlərinin adlarını daşıyan hərbi bazaların və digər strukturların adının dəyişdirilməsini müəyyən etməkdir. Yeni Pentaqon rəhbəri Trampın bu qurumda olan kadrlarının yerinə 4 nəfər təyin edəcək.

Ana səhifəyə dön