“Artıq Ukrayna Qərb dövlətlərinə o qədər də inanmır və Türkiyə ilə...”

“Bir neçə gündür Ukraynada baş verən hadisələr dünya mediasının əsas gündəmlərindən birinə çevrilib. Ukraynanın şərqində yerləşən və Rusiya tərəfindən dəstəklənən separatçı rejimlərlə Ukrayna ordusu arasında gərgin vəziyyət davam etməkdədir”.

Reyting.az xəbər verir ki, bunu siyasi ekspert Samir Hümbətov deyib. O, yayılan məlumatlar arasında Ukrayna Silahlı Qüvvələri tərəfindən separatçıların nəzarətində olan bir kəndin geri alınması ilə bağlı informasiyalara rast gəlindiyini bildirib.

“Burada diqqəti çəkən bir neçə mühüm məqam var. Bunlardan biri Ukrayna Silahlı Qüvvələri ilə Rusiyanın dəstək verdiyi separatçı rejimlər arasında baş vermiş toqquşmalarda Ukrayna tərəfinin ötən il Türkiyədən aldığı PUA-lardan uğurla istifadə etməsidir ki, bu da Rusiya tərəfini ciddi şəkildə narahat etməyə başlayıb. Ona görə də Rusiya prezidenti Vladimir Putin Təhlükəsizlik Şurasının iclası zamanı bu məsələyə toxunaraq PUA-lardan danışıb və bildirib ki, "Biz PUA-larla bağlı problemə Suriyada da rast gəlmişik". Putin Türkiyənin adını birbaşa səsləndirməsə də, üstüörtülü eyham vurub.

PUA-larla bağlı Rusiya XİN başçısı Sergey Lavrov və Rusiya prezidentinin mətbuat xidmətinin rəhbəri Dimitri Peskov da açıqlama verib. Türkiyə XİN başçısı Mövlud Çavuşoğlu Rusiya XİN başçısı Sergey Lavrovla görüşərkən Ukraynanın Türkiyədən aldığı PUA-lardan istifadə etməsinə münasibət bildirərək deyib ki, "PUA-lar Türkiyədə istehsal edilə bilər, amma istifadəsi Ukrayna tərəfindən həyata keçrilir.

Dimitri Peskov isə PUA-larla bağlı məsələyə toxunaraq bildirib ki, Türkiyə ilə yaxşı münasibətlərimiz var, amma belə məsələlər tərəflər arasında narahatlıq yaradır".

Ekspertin sözlərinə görə, son yayılan məlumatlara əsasən, Rusiya artıq Ukrayna ilə sərhəddə 90 minə yaxın qoşun toplayıb:

“Görünən odur ki, Ukrayna öz ərazi bütövlüyünü bərpa etməkdə, Rusiya isə separatçıları dəstəkləməkdə israrlıdır. Baş verən proseslər göstərir ki, tərəflərdən biri geri addım atmasa, aralarında lokal xarakterli toqquşmanın olması gözləniləndir.

Təbii ki, burada Rusiya üçün önəmli olan digər bir məsələ Türkiyənin Ukrayna ilə bağlı mövqeyidir. Ona görə ki, ötən il Ukrayna prezidenti Vladimir Zelenski Ankaraya səfər etdi və tərəflər arasında 21 maddədən ibarət müqavilə imzalandı. Bu müqavilənin bir sıra bəndlərində tərəflər arasında hərbi əməkdaşlıqla bağlı məsələlər xüsusilə qeyd edilib. Həmçinin Ukraynanın son addımlarından da belə anlaşılır ki, artıq Ukrayna Qərb dövlətlərinə o qədər də inanmır və ona görə də Türkiyə ilə münasibətlərin sıxlaşdırılmasına çalışır”.

S. Hümbətov vurğulayıb ki, tərəflər arasında gərginlik hər gün artan xətt üzrə davam edir:

“Hər an toqquşmanın baş verməsi gözləniləndir. Məsələyə hərtərəfli yanaşsaq, belə qənaətə gəlmək olar ki, Rusiyanın özü də Ukrayna ilə qarşıdurmaya getmək niyyətində deyil. Ona görə ki, Rusiyaya qarşı Qərbdən yetərincə təzyiqlər və sanksiyalar var. Əgər yeni qarşıdurmaya gedərsə, bu, Rusiyaya qarşı daha genişmiqyaslı sanksiyaların və daha ciddi təzyiqlərin baş verməsi deməkdir ki, bu da iqtisadi durumu ağır olan Rusiya üçün arzuolunmazdır. Həm də baş verə biləcək mümkün müharibə ssenarisində Türkiyə hərbi əməkdaşlığa sadiq qalaraq Ukraynanın yanında yer alarsa, bu, Rusiya ilə üz-üzə gəlmək deməkdir ki, tərəflər bundan razı qalacaq kimi görünmür.

Rusiya üçün digər narahatedici məsələ ABŞ-ın Ukraynaya dəstəyidir. ABŞ-ın Ukraynaya əsas dəstəyi silah-sursat və hərbi texnika ilə bağlıdır. Yəni burada ciddi qarşıdurmanın olmaması üçün tərəflər mümkün qədər səbrli davranmağa çalışırlar”.

Ana səhifəyə dön