Putinin daha bir məxfi planı üzə çıxıb

Kreml daxilindən məxfi məlumatlar paylaşan “Telegram” kanalı bu dəfə Rusiya liderinin Ukraynadakı müharibəni uduzacağı təqdirdə, təyyarəyə minərək Türkiyə üzərindən başqa ölkəyə uçacağını yazıb.

Reyting.az-ın xəbərinə görə, Britaniya mətbuatı yazır ki, Rusiya lideri Putin Ukraynada məğlub olarsa, Rusiyadan qaçmağı planlaşdırır.

Kremldən bir çox məlumatı üzə çıxaran “Telegram” kanalına əsaslanan məlumatda bildirilir ki, Rusiya prezidenti və onun yaxın müttəfiqləri üçün bir təyyarə gözləmə mövqeyindədir.

İddia olunur ki, Putin və ailəsini daşıyan təyyarənin marşrutu Suriya ola bilər. 2015-ci ilin sentyabrında meydançaya enərək Suriyadakı vətəndaş müharibəsinin taleyini dəyişən Rusiya lideri xilas etdiyi Bəşər Əsədin qonağı olacaq.

Putinin təxliyyə təyyarəsinin Türkiyə üzərindən keçəcəyini qeyd edən Britaniya mətbuatı Rusiya liderinin səhhətində müəyyən problemlər olduğunu da yazıb.

Xatırladaq ki, Rusiya ordusu paytaxt Kiyev ətrafından dəf edilsə də, Qara dəniz sahilindəki Mariupol liman şəhəri aylarla davam edən atəşdən sonra rusların əlinə keçib. Donbasdakı Luqansk bölgəsi aylarla davam edən ölümcül döyüşlərdən sonra yenidən tamamilə Rusiyanın nəzarətindədir.

Ukrayna ordusu müharibənin ilk günlərində Rusiya tərəfindən işğal edilmiş cənubdakı Xerson şəhərini geri almaq üçün irəliləyir. Xersonu Krımla birləşdirən Dnepr çayı üzərindəki körpülər bir-bir bombalanır. Hazırda Dnepr çayı üzərində cəmi üç körpü qalıb, qatar relsləri olan bütün körpülər dağıdılıb.

Rus işğalçılarının Xersondakı təchizat xətlərinin bir neçə günə tamamilə kəsiləcəyi gözlənilir.

Müharibə ilə bağlı səhər qeydini paylaşan Britaniya kəşfiyyat xidməti bildirir ki, Ukrayna əsgərləri körpüləri partlatdıqdan sonra Rusiya ordusu Dnepr çayını keçmək üçün ponton körpülərdən və ya bərələrdən istifadə edib. Britaniya məxfi xidmətinin məlumatına görə, iki ponton körpüsü qurulub və rus əsgərləri körpülərdən Xerson tərəfinə keçə bilərlər.

Donetskdə irəliləməsi dayanan rus ordusu bir neçə cəbhədə yenidən hücuma keçsə də, verdiyi itkilərdən sonra mövqelərinə qayıdıb.

Digər tərəfdən, Vaşinqtonda yerləşən Müharibə Araşdırmaları İnstitutu (ISW) bildirir ki, Rusiya mediasının əks etdirdiyi kimi, Donetskdə Yelenovkada onlarla ukraynalı hərbi əsirlərin həlak olduğu partlayışa HIMARS raketləri səbəb olmayıb.

Moskva cümə günü həbsxanada saxlanılan hərbi əsirlərin ABŞ-ın Ukraynaya göndərdiyi HİMARS raketləri ilə vurulduğunu açıqlayıb. Lakin bir neçə dəqiqə sonra Kiyev administrasiyası heç bir hücum olmadığını, Rusiyanın əsirləri partlayışla öldürdüyünü açıqlayıb. ISW bildirir ki, ilkin sübutlar Kiyev administrasiyasının izahatlarını dəstəkləyir.

ISW-nin dərc etdiyi hesabatda diqqət çəkən digər məqam isə Rusiya-Monqolustan sərhədində Buryatiya və Novosibirskdə çoxlu sayda kişilərin hərbi xidmətə cəlb edilməsi haqdadır. Hələlik səfərbərliyi rəsmən elan etməyən Rusiya lideri Vladimir Putin Ukraynaya könüllü qoşunlar göndərməklə döyüş gücünü artırmağa çalışır.

Britaniyanın “Financial Times” qəzeti yazır ki, Rusiya tanklarının Ukraynaya hücum edəcəyi gözlənilən soyuq qış günlərində Ukraynaya silah əvəzinə dəbilqə göndərən Almaniya növbəti dəfə məyusluğa səbəb olub. Xəbərə görə, Almaniya Şərqi Avropa ölkələrinin Ukraynaya göndərdiyi Sovet İttifaqı dövründən qalma silahların əvəzinə qonşularına öz silahlarını göndərəcək. Amma hələ ki, Berlin administrasiyası heç bir addım atmayıb.

“Financial Times” yazır ki, Almaniya Sloveniya, Yunanıstan, Polşa və Çexiya ilə uzunmüddətli danışıqlar aparıb, lakin bu ölkələrin heç biri ilə müqavilə imzalamayıb.

Rus işğalçılarına qarşı Ukraynaya 240 Sovet T-72 tankı göndərən Polşa Almaniyanın ona Leopard tankları verəcəyini gözləyir. Lakin Berlin administrasiyası Varşavaya cəmi 20 tank təklif etdi. Varşava administrasiyası tankları dəyişdirmək üçün ABŞ və Cənubi Koreya ilə əlaqə saxlayarkən bir Alman rəsmisi "Polşa ilə razılaşma faktiki olaraq ölüdür",- deyib.

Nəşr həmçinin vurğulayır ki, Almaniyanın avropalı qonşuları ilə problemləri olsa da, Ukraynaya silah göndərib. Berlin administrasiyası tərəfindən göndərilən Gepard zenit silahları cəbhə xəttinə çatıb, Mars II reaktiv yaylım atəşi sistemləri və PzH topları da ruslara qarşı istifadə olunur.

Ana səhifəyə dön