Devrildiyi iddia olunan Çin lideri yenidən dövlət başçısı olmaq istəyir

Çin dövlətinin başçısı Si Cinpin Pekində çevriliş iddialarından sonra ilk dəfə ictimai tədbirə qatılıb.

Reyting.az xəbər verir ki, CCTV dövlət televiziyasının bildirdiyinə görə, S. Cinpin dünən günorta saatlarında Pekin Sərgi Mərkəzində keçirilən və 10 illik hakimiyyəti dövründə iqtisadi inkişafın izah edildiyi “Yeni dövrdə sürətli irəliləmə” adlı sərgini ziyarət edib.

Səfər çərçivəsində S. Cinpini Çin Kommunist Partiyası (ÇKP) Mərkəzi Komitəsinin Siyasi Bürosunun Daimi Komitəsinin üzvləri, Baş nazir Li Kiqiang, Ümumçin Xalq Nümayəndələri Yığıncağının (ÜÇK) sədri Li Canshu müşayiət ediblər.

Çin Xalq Siyasi Məşvərət Şurasının (ÇXR) üzvü Vanq Yang, ÇKP-nin birinci katibi Van Huninq, ÇKP Mərkəzi İntizam Komissiyasının sədri Kao Lici, Baş nazirin müavini Han Cing və digər rəsmi şəxslər də Si Cinpinin ətrafında olublar.

S. Cinpin 15-16 sentyabr tarixlərində Özbəkistanın Səmərqənd şəhərində keçirilən Şanxay Əməkdaşlıq Təşkilatının Sammitində iştirak etmək üçün COVID-19 epidemiyasının başlanmasından bəri təxminən 2,5 ildən sonra ilk dəfə xaricə səfər etmişdi.

Zirvədən qayıtdıqdan sonra 10 gün ərzində Çin lideri bəyanatlar verib, mesajlar dərc edib, lakin ictimai tədbirlərə və görüşlərə qatılmayıb.

Hesab edilir ki, S. Cinpin Səmərqənd toplantısından sonra iqamətgahı və ÇKP qərargahının yerləşdiyi Pekindəki Konqnanhay şəhərciyində karantində qalmaqla ictimai tədbirlərdən və nümayəndə heyəti ilə təmaslardan yayınmış ola bilər.

Məlumdur ki, Çində yüksək səviyyəli məmurlar xaricə səfərlərdən qayıtdıqdan sonra nümayəndə heyətləri ilə birlikdə təyin olunmuş yerlərdə və ya iş sahələrində karantində qalırlar.

Ölkədə xaricdən gələnlərə 7 gün icbari mərkəzi karantin və 3 günlük ev karantini tətbiq edilir.

S. Cinpin və nümayəndə heyətinin karantində qalıb-qalmaması ilə bağlı rəsmi açıqlamanın olmaması, gələn ay ÇKP-nin kritik 20-ci Milli Konqresi ərəfəsində çevriliş şayiələrinə səbəb olub.

Həftə sonu internetdə və sosial mediada, xüsusən də “Twitter”-də paytaxt Pekində hərbi fəaliyyətin olduğu və dövlət başçısının hakimiyyətdən devrildyi haqda iddialar səsləndirilib. Yayımlanan bəzi videolar və şəkillər qısa müddət ərzində dünyadakı istifadəçilər tərəfindən dəfələrlə paylaşılıb.

Oktyabrın 16-da paytaxt Pekində başlayacaq ÇKP-nin 20-ci Milli Konqresi qarşıdakı 5 ildə Çinin liderlik və idarəetmə kadrlarını formalaşdıracaq.

Qurultayda nümayəndələr 205 həqiqi və 171 ehtiyat üzvdən ibarət olan ÇKP Mərkəzi Komitəsini seçəcəklər. Daha sonra yeni seçilən Mərkəzi Komitə 25 nəfərdən ibarət Siyasi Büronu və 7 nəfərdən ibarət Siyasi Büronun Daimi Komitəsini müəyyən edəcək.

Çin Xalq Respublikasının qurucusu Mao Zidonqdan sonra iki müddətdən artıq dövlət başçısı səlahiyyətlərini həyata keçirən ilk lider olmaqla, ÇKP-nin baş katibi və sədri S. Cinpinin Konqresdə vəzifəsini qoruyub saxlayacağı gözlənilir.

Xatırladaq ki, Çin Konstitusiyasına 2018-ci ildə edilən düzəlişlə sədrlik müddətini iki müddətlə məhdudlaşdıran qayda ləğv edilib və beləliklə, Cinpinin liderliyini üçüncü müddətə daşımasına yol açılıb.

Birpartiyalı hökumətin və konstitusiyada güclərin birliyi prinsipinin mövcud olduğu Çində Kommunist Partiyası mərkəzi və yerli hökumətlərin, qanunvericilik, məhkəmə və məşvərət orqanlarının, ictimai qurum və təşkilatların idarə edilməsini müəyyənləşdirir.

Ana səhifəyə dön