İşğala rəhbərlik edən 5 generaldan 4-ü vəzifədən kənarlaşdırılıb

2022-ci ilin fevral ayında Ukraynanın tammiqyaslı işğalına bilavasitə rəhbərlik edən Rusiyanın beş generalından dördü tutduqları vəzifədən kənarlaşdırılıblar. Lakin onların dəyişdirilməsi indiyədək Rusiyanın hərbi əməliyyatlarını təkmilləşdirmək üçün kifayət etməyib.

Reyting.az xəbər verir ki, bu barədə Böyük Britaniya Müdafiə Nazirliyi hərbi kəşfiyyat məlumatlarına əsasən bildirib.

“Komandirliyin davamlılığının olmaması, ehtimal ki, Qərb ordusuna nisbətən daha zərərlidir, çünki Rusiya doktrinasına uyğun olaraq, planların hazırlanması daha geniş bir qərargahın kollektiv işi kimi deyil, əsasən şəxsən komandirdən asılıdır”,- kəşfiyyatın hesabatında deyilir.

Britaniya kəşfiyyatı bildirir ki, Rusiya ordusunda yeni səfərbər olunmuş ehtiyatda olan əsgərləri təşkil etmək və onlara rəhbərlik üçün kiçik zabit çatışmazlığı var. Aşağı səviyyəli rəhbərliyin zəif olması, çox güman ki, Rusiya qüvvələrinin bir çox hissələrində onsuz da aşağı əhval-ruhiyyəni və birləşmə birliyini daha da gücləndirir.

“Şahidlərin ifadələri göstərir ki, 2022-ci il oktyabrın 15-də Belqorod yaxınlığında zabit milli azlıqlardan olan əsgərləri təhqir etdikdən sonra 11 rus əsgərini güllələyib”, - kəşfiyyat agentliyi xatırladıb.

Bu arada Rusiya prezidenti Vladimir Putin tərəfindən Ukraynanın işğalına başçılıq etmək üçün təyin olunan general Sergey Surovikin Xerson şəhərinin “çətin vəziyyətdə” olduğunu və mülki əhalinin təxliyə ediləcəyini bildirib. Ukrayna əsgərlərinin ABŞ-ın HİMARS raketləri ilə Xersonun infrastrukturuna zərbələr endirdiyini deyən general iddia edib ki, mülki evlər də hədəfə alınır.

Yeni vəzifəyə təyin olunduqdan sonra ilk dəfə Rusiya dövlət televiziyasına çıxan general Surovikin “Rusiya ordusu köçürülmənin təhlükəsiz keçməsini təmin edəcək”,- deyib.

Rus komandirinin meydandakı böyük problemləri qəbul etdiyi barədə açıqlamaları yerli hakimiyyət orqanları tərəfindən də təkrarlanır. Rusiya tərəfindən təyin edilən Kirill Stremousov bildirib ki, Ukrayna qoşunları yaxın vaxtlarda şəhərin mərkəzinə hücuma başlaya bilər. Teleqram mesajında Stremousov Dnepr çayının qərbində yaşayanların xüsusilə risk altında olduqlarını bildirib.

Qeyd olunur ki, Ukrayna qoşunları bir neçə həftədir, tədricən Xersonun şimal və qərbindəki torpaqları nəzarətə götürür. Daha əvvəl Suriyada xidmət etmiş general Surovikin verdiyi açıqlamada “Xüsusi əməliyyat bölgəsində vəziyyət gərgindir”,- deyib.

Ukraynanın bölgədə tez-tez raket hücumları təşkil etdiyini bildirən Surovikin, bir körpünün və bəndin zədələndiyini, qida, su və elektrik paylamasında fasilələrə səbəb olduğunu qeyd edib.

Ana səhifəyə dön