“Əl-Qaidə” liderinin 228 səhifəlik gündəliyi…

Terrorçu Üsamə bin Laden öldürülsə də, onun evindən çıxan 228 səhifəlik gündəlik və oradakı qeydlər müəmmalı olaraq qalır. Bu gündəliklərlə bağlı bəzi məqamlar açıqlansa da, daha lazımlı informasiyalar məxfi salanılır.

Reyting.az xatırladır ki, 11 sentyabr 2001-ci ildə ABŞ-da ard-arda törədilən terror aktlarından sonra dünya yeni dövrə qədəm qoydu. ABŞ-ın Əfqanıstan və İraqı işğal etməsindən sonra Yaxın Şərqdəki xaos eksponent olaraq artdı. ABŞ uzun illər 11 sentyabr hücumlarının icraçısı kimi tanınan “Əl-Qaidə” terror təşkilatının lideri Üsamə bin Ladenin izinə düşdü. Təqvimlər 2010-cu ili göstərəndə bütün bu prosesi bitirəcək bir ipucu tapıldı.

Qeyd edək ki, “Əl-Qaidə” kuryerini izləyən ABŞ kəşfiyyatı kuryerin tez-tez ziyarət etdiyi evə diqqət yetirib. Uzun təqiblərdən və sahə araşdırmalarından sonra illərdir axtarışda olan “Əl-Qaidə” lideri Üsamə bin Ladenin Pakistanın paytaxtı İslamabadın şimalında, Abbottabad bölgəsindəki bu evdə ola biləcəyi müəyyən edilib.

ABŞ təhlükəsizlik mənbələrinə görə, Üsamə bin Ladenin hədəf binanın içində olma ehtimalı cəmi 55 faiz olub. Uzun sürən qiymətləndirmələrdən sonra ABŞ Hərbi Dəniz Qüvvələri xüsusi təyinatlılarla birlikdə binanı ələ keçirmək qərarı verib. “Neptunun nizə əməliyyatı” adlanan əməliyyat mayın 1-dən mayın 2-nə keçən gecənin ilk dəqiqələrində ABŞ ordusuna aid iki helikopter Əfqanıstandan qalxaraq çox alçaq hündürlükdə Pakistan ərazisinə daxil olub. 40 dəqiqə davam edən əməliyyat nəticəsində Üsamə bin Laden ölü olaraq ələ keçirilib və ABŞ-ın illərdir apardığı axtarışlar “uğurla” başa çatıb.

Bin Ladenin öldürüldüyü evdə ələ keçirilən məlumat və sənədlər əməliyyatdan qısa müddət sonra Üsamə bin Ladenin şəxsi əşyaları ilə birlikdə ictimaiyyətlə paylaşıldı.

İllərlə aparılan təqib və əməliyyatdan sonra Üsamə bin Ladenin yerləşdiyi evdə internet və telefon əlaqəsinin olmadığı müəyyən edilib. Terrorçunun texniki təqibə düşməmək üçün kuryerlər vasitəsilə “Əl-Qaidə”nin yüksək səviyyəli adları ilə əlaqə saxladığı bəlli olub. “Əl-Qaidə” lideri yazışmalarını portativ yaddaşa yazaraq, həmin yaddaşı kuryerlərə verdiyi və kuryerin internet kafelər vasitəsilə daxili yazışmalar apardığı müəyyən edilib.

Evdə ələ keçirilən xatirələrdə təbliğat, strategiya və fətvalarla bağlı sənədlər, çoxsaylı daxili yazışmalar və sifarişlər aşkar edilib.

Üsamə bin Ladenin Pakistandakı evinə basqın zamanı 470 min sənəd arasında ona məxsus 228 səhifəlik gündəlik aşkarlanıb. Bin Ladenin qızlarından birinin onun adına yazıldığı güman edilən gündəlikdə məlum olan proseslə bağlı “Ərəb baharının, xaos və inqilablarda liderliyin olmamasının “Əl-Qaidə”nin fikir və ideyalarının yayılması üçün ən yaxşı mühitdir”,- deyilir.

Müsadirə olunan və dərc edilən sənədlər arasında “Əl Qaidə” liderinin sevimli oğlu kimi göstərilən Həmzə bin Ladenin İranda lentə alınacaq toy görüntüləri də var. Toyda qeydə alınan görüntülər, Üsamə bin Ladendən sonra “Əl-Qaidə”yə rəhbərlik edəcəyi proqnozlaşdırılan Həmzə bin Ladenin ilk dəfə görünməsi idi.

Həmzə Bin Ladenin “Əl-Qaidə”nin yüksək rütbəli üzvü Əbu Məhəmməd Əl-Məsrinin qızı ilə evləndiyi müəyyənləşib və toyda “Əl-Qaidə”nin rəhbərliyindən bir çox şəxslər iştirak edib. Qonaqlar arasında ən çox diqqət çəkənlərdən biri də 1981-ci ildə Misir prezidenti Ənvər Sədatı öldürən Xalid İslambulinin qardaşı Məhəmməd Şevki İslambuli olub.

Onu da qeyd edək ki, Həmzə bin Laden 2019-cu ildə öldürülüb.

ELÇİN

Ana səhifəyə dön