Putinin “məğlubedilməz” raketi Ukraynada məğlub olub

Kamikadze pilotsuz uçuş aparatlarının (PUA) aparıcı rol aldığı Rusiya-Ukrayna müharibəsində təxminən 3000 kilometr məsafədə hədəfi vura bilən raketləri tutmaq mümkün olur.

Reyting.az xəbər verir ki, Pentaqon Putinin “məğlubedilməz” adlandırdığı hipersəs raketinin Patriotlar tərəfindən vurulduğunu dünyaya elan edib.

Rusiyanın atdığı hipersəsli “Xəncər” raketinin vurulması Rusiya-Ukrayna savaşında yeni səhifə açır. Keçən həftə Rusiyanın Ukrayna işğalının kilidləndiyi Baxmutdan çəkiləcəyini açıqlayan “Vaqner” sonradan geri addım atıb. “Vaqner”in rəhbəri Yevgeni Priqojin bundan əvvəl Rusiyanın müdafiə naziri Sergey Şoyqu və Baş Qərargah rəisi Valeri Gerasimovu söyərək Baxmutdan geri çəkiləcəklərini bəyan etmişdi. Amma yeni videosunda Priqojin qərardan imtina etdiklərini bildirib.

Rusiya ordusu isə Ukraynanın paytaxtı Kiyevə və Qara dənizdəki kritik liman şəhəri Odessaya gecə saatlarında dronlarla hücum edib. Gecə hava hücumu həyəcanı eşidilib və 40 dəqiqə ərzində Rusiya pilotsuz təyyarələrinə qarşı hava hücumundan müdafiə sistemləri işə salınıb. Nəticədə Brynaskdakı Seşça aviabazasından qalxan İran istehsalı olan 35 ədəd “Şahid-136” kamikadze təyyarəsi bir-bir Kiyev səmasında yerə endirilib.

Kiyev qubernatoru Vitali Kliçko səmadan düşən pilotsuz təyyarə parçaları və raket qalıqları nəticəsində beş paytaxt sakininin yaralandığını açıqlayıb. Qara dəniz sahilindəki Odessada hava hücumundan müdafiə sistemlərini üstələyən Rusiya raketləri böyük yanğınlara səbəb olub. X-22 model rus raketlərinin Odessada anbar və istirahət zonasına düşdüyü bildirilir.

2014-cü ildə Rusiya lideri Vladimir Putin tərəfindən ələ keçirilən Krıma da pilotsuz uçuş aparatı ilə hücum davam edib. Son bir neçə həftədir ukraynalıların tez-tez dronlarla hədəf aldığı yarımadada bu dəfə Çin istehsalı olan PUA-larla hücumlar olub.

Hazırda az qala pilotsuz təyyarə müharibəsinə çevrilən Rusiya-Ukrayna savaında ən təəccüblü hadisə Ukrayna sərhədindən 2 min 950 kilometr aralıda yerləşən Novosibirskdə baş verib. Mərkəzi Asiya ölkəsi Qazaxıstanın şimal-şərqində, Novosibirskdə Rusiyanın döyüş təyyarələri zavodunda kamera ilə uçan pilotsuz təyyarə aşkarlanıb. Su-34 qırıcı təyyarələri keçmiş Çkalov adına Novosibirsk Aviasiya Zavodunda istehsal olunur. Rusiyanın ən böyük təyyarə zavodlarından biri olan müəssisə eyni zamanda S-70 Oxotnik ağır bombardmançı təyyarələrini də istehsal etməyə hazırlaşır. Rusiya rəsmilərinin verdiyi məlumata görə, zavodun giriş-çıxışlarını izləyən PUA-da əlavə akkumulyator olub. Yerli mənbələr bildirirlər ki, kamerasında hərəkət sensoru olan dron batareyası bitdiyi üçün qəzaya uğrayıb.

Ukrayna ordusunun açıqladığı Rusiya hipersəs raketi “Xəncər”in Amerikanın “Patriot” hava hücumundan müdafiə sistemləri tərəfindən vurulması barədə məlumat Vaşinqton tərəfindən təsdiqlənib. ABŞ mənbələri “CNN International”-a bildiriblər ki, Kiyev səmasına atılan hipersəs raketi ABŞ-da təlim keçmiş Ukrayna komandaları tərəfindən məhv edilib. CNN xatırladır ki, məşhur Patriot hava hücumundan müdafiə sistemləri indiyədək adi ballistik raketlərə qarşı istifadə olunub və hipersəs raketlərini vurmaq qabiliyyəti yalnız nəzəri olaraq ifadə edilib.

V. Putin tərəfindən ilk dəfə 2018-ci ilin martında təqdim edilən “Xəncər” hipersəs raketi Rusiya lideri tərəfindən “məğlubedilməz” kimi qiymətləndirilib.

“Sürəti onları bugünkü hava hücumundan müdafiə və raketdən müdafiə sistemlərinə qarşı məğlubedilməz edir. Sadə dillə desək, onları tutmaq olmaz. Dünyanın aparıcı ordularının bu silahları əldə etməyə çalışdığını başa düşmək asandır. Əziz dostlar, Rusiyada bu silahlar var”,- deyən Putin əlavə etmişdi ki, raket səsdən 10 dəfə sürətlidir.

ELÇİN

Ana səhifəyə dön